ರೀಚಾರ್ಜ್ ಮುಗಿದರೆ ಇನ್‌ಕಮಿಂಗ್ ಕಾಲ್ ಕೂಡಾ ಬಂದ್‌‌‌…!ಗ್ರಾಹಕರ ಹಗಲು ದರೋಡೆ ನಡೆಸುತ್ತಿರುವ ಟೆಲಿಕಾಂ ಕಂಪನಿಗಳು.

ನವದೆಹಲಿ : ದೇಶದಲ್ಲಿ ಮೊಬೈಲ್‌ ಹಾಗೂ ಡೇಟಾ ಬಳಕೆ ಕಳೆದ ಹತ್ತು ವರ್ಷಗಳಲ್ಲಿ ಗಣನೀಯವಾಗಿ ಏರಿಕೆ ಕಂಡಿದೆ. ಮಾರುಕಟ್ಟೆಗೆ ಜಿಯೋ ಎಂಟ್ರಿ ಕೊಟ್ಟಾಗಿನಿಂದ ಹೆಚ್ಚಾದ ಡೇಟಾ ಹಾಗೂ ಮೊಬೈಲ್ ಬಳಕೆದಾರರು ಈಗ ಅತಿಹೆಚ್ಚು ಸಂಖ್ಯೆಯಲ್ಲಿದ್ದಾರೆ.

ಮೊದಲು ಉಚಿತ ಸೇವೆಗಳಿಂದ ಗ್ರಾಹಕರನ್ನು ಖುಷಿ ಪಡಿಸಿದ ಟೆಲಿಕಾಂ ಕಂಪನಿಗಳು, ಈಗ ಗ್ರಾಹಕರನ್ನು ಸುಲಿಗೆ ಮಾಡಲು ಶುರುವಿಟ್ಟುಕೊಂಡಿವೆ.

ರೀಚಾರ್ಜ್ ಮುಗಿಯುತ್ತಿದ್ದಂತೆಯೇ ಬಂದ್ ಆಗಲಿದೆ ಇನ್‌ಕಮಿಂಗ್ ಸೇವೆ..!

ರೀಚಾರ್ಜ್ ಪ್ಲಾನ್‌ಗಳ ದರ ಹೆಚ್ಚಳದಿಂದ ರೋಸಿಹೋಗಿರುವ ಬಳಕೆದಾರರಿಗೆ ಈಗ ಸದ್ದಿಲ್ಲದೇ ಇನ್ನೊಂದು ಬರೆ ಎಳೆಯಲು ಕಂಪನಿಗಳು ತಯಾರಾಗಿವೆ. ನಿಮ್ಮ ರೀಚಾರ್ಜ್ ಪ್ಲಾನ್ ಮುಗಿಯುತ್ತಿದ್ದಂತೆ ನಿಲ್ಲುತ್ತಿದ್ದ ಡೇಟಾ ಹಾಗೂ ಹೊರ ಹೋಗುವ ಕರೆಗಳೆ ಜೊತೆಗೆ ಇನ್‌ಕಮಿಂಗ್ ಕಾಲ್‌ಗಳನ್ನೂ ನಿಲ್ಲಿಸಲಾಗುತ್ತಿದೆ. ಇದು ಬಡ ಹಾಗೂ ಮಧ್ಯಮ ವರ್ಗದ ಜನರಿಗೆ ಗಾಯದ ಮೇಲೆ ಬರೆ ಎಳೆದಂತಾಗಿದೆ. ಈಗ ಏರ್‌ಟೆಲ್ ಬಳಕೆದಾರಿಗೆ ಈ ತೊಂದರೆ ಕಾಡತೊಡಗಿದ್ದು ಉಳಿದ ಟೆಲಿಕಾಂ ಕಂಪನಿಗಳೂ ಇದೇ ಹಾದಿ ಹಿಡಿಯಲಿವೆಯಾ ಕಾದು ನೋಡಬೇಕು.

ಇದರ ವಿರುದ್ದ ಸೋಷಿಯಲ್ ಮೀಡಿಯಾದಲ್ಲೂ ತೀವ್ರ ಪ್ರಯಿಕ್ರಿಯೆಗಳು ವ್ಯಕ್ತವಾಗುತ್ತಿದ್ದು TRAI ಮಧ್ಯಪ್ರವೇಶಕ್ಕೆ ಆಗ್ರಹಗಳು ಕೇಳಿ ಬರುತ್ತಿದೆ.