ಮಂಗಳೂರು ವಿಮಾನ ನಿಲ್ದಾಣದಿಂದ ಹಾರಲಿವೆ ಇನ್ನಷ್ಟು ವಿಮಾನ.ದೇಶೀಯ ಹಾಗೂ ವಿದೇಶಕ್ಕೆ ಹೆಚ್ಚಲಿದೆ ವಿಮಾನ ಹಾರಾಟ..!

ಮಂಗಳೂರು: ಬಜ್ಪೆಯ ಮಂಗಳೂರು ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಿಂದ ಪ್ರಯಾಣಿಸುವವರಿಗೆ ಸಂತಸದ ಸುದ್ದಿಯೊಂದು ಬಂದಿದೆ. ಮಾರ್ಚ್ ತಿಂಗಳಿನಿಂದ ಮಂಗಳೂರು ಮೂಲಕ ದೇಶೀಯ ಹಾಗೂ ವಿದೇಶಿ ವಿಮಾನ ಸೇವೆಗಳ ಸಂಖ್ಯೆಯನ್ನು ಹೆಚ್ಚಿಸಲು ಏರ್‌ಲೈನ್ಸ್ ಸಂಸ್ಥೆಗಳು ಮುಂದಾಗಿವೆ.

ಏರ್ ಇಂಡಿಯಾ ಎಕ್ಸ್‌ಪ್ರೆಸ್ ಸಂಸ್ಥೆಯು ಮಂಗಳೂರು-ಮಸ್ಕತ್ ನಡುವಿನ ವಿಮಾನ ಸೇವೆಯನ್ನು ಮಾರ್ಚ್ 1ರಿಂದ ಮತ್ತೆ ಆರಂಭಿಸಲಿದೆ. ಈ ಮಾರ್ಗದಲ್ಲಿ ವಾರಕ್ಕೆ ಎರಡು ಬಾರಿ ವಿಮಾನ ಹಾರಾಟ ಇರಲಿದೆ. ಇನ್ನು ಇಂಡಿಗೋ ಸಂಸ್ಥೆಯೂ ಮಂಗಳೂರು-ಅಬುಧಾಬಿ ನಡುವಿನ ದಿನನಿತ್ಯದ ವಿಮಾನ ಸೇವೆಯನ್ನು ಮಾರ್ಚ್ ತಿಂಗಳಿಂದ ಪುನರಾರಂಭಿಸುವುದಾಗಿ ತಿಳಿಸಿದೆ.

ಮಂಗಳೂರು-ದಮ್ಮಾಮ್ ಮಾರ್ಗದ ಸೇವೆಯನ್ನು ಮಾರ್ಚ್ ತಿಂಗಳಲ್ಲಿ ವಾರಕ್ಕೆ ಆರು ಬಾರಿಗೆ ಹೆಚ್ಚಿಸಲಾಗುತ್ತಿದ್ದು, ಏಪ್ರಿಲ್‌ನಿಂದ ಪ್ರತಿದಿನವೂ ವಿಮಾನ ಸಂಚಾರ ಆರಂಭವಾಗುವ ಸಾಧ್ಯತೆಯಿದೆ. ಇದೇ ವೇಳೆ ಬಹ್ರೇನ್-ಮಂಗಳೂರು ಮಾರ್ಗದಲ್ಲಿ ಮಾರ್ಚ್ ಮೊದಲ ಎರಡು ವಾರಗಳ ಅವಧಿಗೆ ತಾತ್ಕಾಲಿಕವಾಗಿ ವಾರಕ್ಕೆ ನಾಲ್ಕು ವಿಮಾನ ಸೇವೆಗಳನ್ನು ಒದಗಿಸಲಾಗುತ್ತಿದೆ.

ದೇಶೀಯ ಮಾರ್ಗಗಳಲ್ಲಿಯೂ ಬದಲಾವಣೆ ಕಂಡುಬರುತ್ತಿದ್ದು ಮಂಗಳೂರು-ಬೆಂಗಳೂರು ನಡುವಿನ ಮಾರ್ಗದಲ್ಲಿ ಮಾರ್ಚ್ 13 ರಿಂದ 26 ರವರೆಗೆ ಮೂರನೇ ದಿನನಿತ್ಯದ ವಿಮಾನ ಸೇವೆ ಆರಂಭವಾಗಲಿದೆ. ಇದರಿಂದ ಕೆಲಸ, ಶಿಕ್ಷಣ ಹಾಗೂ ವ್ಯಾಪಾರ ಉದ್ದೇಶಕ್ಕಾಗಿ ಸಂಚರಿಸುವವರಿಗೆ ಹೆಚ್ಚು ಅನುಕೂಲವಾಗಲಿದೆ.

ಇದಲ್ಲದೆ, ಇಂಡಿಗೋ ಸಂಸ್ಥೆಯು ಮಂಗಳೂರಿನಿಂದ ದಮ್ಮಾಮ್, ಜೆದ್ದಾ, ಕೊಚ್ಚಿನ್ ಹಾಗೂ ಕೊಲ್ಕತ್ತಾ ಕಡೆ ಹೊಸ ವಿಮಾನ ಮಾರ್ಗಗಳನ್ನು ಆರಂಭಿಸುವ ಕುರಿತು ಅಧ್ಯಯನ ನಡೆಸುತ್ತಿದೆ ಎಂದು ತಿಳಿದುಬಂದಿದೆ.

ಒಟ್ಟಾರೆ, ಮಂಗಳೂರು ವಿಮಾನ ನಿಲ್ದಾಣದಿಂದ ಹೆಚ್ಚುತ್ತಿರುವ ವಿಮಾನ ಸೇವೆಗಳು ವಿದೇಶಗಳಲ್ಲಿ ಉದ್ಯೋಗದಲ್ಲಿರುವ ಕನ್ನಡಿಗರು, ವಿದ್ಯಾರ್ಥಿಗಳು ಹಾಗೂ ಪ್ರವಾಸಿಗರಿಗೆ ಹೆಚ್ಚು ಲಾಭವಾಗಲಿದೆ ಎಂಬ ನಿರೀಕ್ಷೆ ವ್ಯಕ್ತವಾಗಿದೆ.